ایک ترک مسلمان نے مسجد نبوی شریف میں پیش آنے والا ایک دل دہلا دینے والا واقعہ یوں بیان کیا:
"میں مسجد نبوی میں کھڑا تھا جب چار پولیس والے کسی کا انتظار کر رہے تھے۔ کچھ دیر بعد ایک شخص آیا جسے پولیس نے فوراً قابو کر لیا اور اس کے ہاتھ باندھ دیے۔ اس نوجوان نے فریاد کی، 'مجھے دعا کرنے دو، میں کوئی چور یا بھکاری نہیں ہوں۔' پھر وہ چیخنے لگا، اور جب میں نے غور سے دیکھا، تو پہچان لیا کہ یہ وہی شخص ہے جسے میں اکثر روضہ رسول ﷺ پر روتے ہوئے دیکھتا تھا۔
یہ ایک 35 یا 36 سالہ البانوی نوجوان تھا، جس کے سنہری بال اور ہلکی داڑھی تھی۔ میں نے پولیس والوں سے کہا کہ اس کا کوئی جرم نہیں ہے، تو اسے کیوں گرفتار کیا جا رہا ہے؟ پولیس والوں نے جواب دیا کہ وہ مدینہ منورہ میں گزشتہ چھ سال سے غیر قانونی طور پر مقیم ہے، اور ہر بار روضہ رسول ﷺ میں پناہ لے لیتا ہے، اس لیے ہم اسے وہاں سے گرفتار نہیں کرنا چاہتے۔ ہمارا ارادہ ہے کہ اسے واپس البانیا بھیج دیا جائے۔
نوجوان مسلسل روتے ہوئے کہہ رہا تھا، 'میں کوئی چور نہیں ہوں، نہ ہی بھکاری۔ میں تو محبت رسول ﷺ میں یہاں رہ رہا ہوں۔' اس نے گنبد خضراء کی طرف رخ کیا اور دعا مانگتے ہوئے کہا:
'یا رسول اللہ ﷺ! کیا میں نے اپنے والدین اور گھر بار کو نہیں چھوڑا تھا؟ کیا ہم نے یہ وعدہ نہیں کیا تھا کہ میں آپ کے قریب رہوں گا؟ اب یہ لوگ مجھے نکالنا چاہتے ہیں، آپ مداخلت کیوں نہیں فرماتے؟'
اتنے میں وہ نوجوان بے حال ہو کر گر گیا۔ پولیس والوں نے اسے ٹھڈا مار کر کہا، 'اٹھ، دھوکے باز!' لیکن وہ حرکت نہ کر سکا۔ میں نے کہا، 'یہ نہیں بھاگے گا، تم پانی لاؤ اور اس کے چہرے پر ڈالو۔' مگر وہ بے حس و حرکت رہا۔ پولیس والوں نے نبض چیک کی تو پتہ چلا کہ اسے مرے پندرہ منٹ ہو چکے ہیں۔
پولیس والے، جو ابھی تک اسے قابو کر رہے تھے، ندامت میں ڈوب گئے اور ایک پولیس والے نے اپنے زانو پیٹتے ہوئے کہا، 'ہائے، ہمیں پتہ نہیں تھا کہ اسے رسول اللہ ﷺ سے اتنی محبت ہے!' پھر نوجوان کی لاش جنت البقیع لے جائی گئی۔
جب جنازہ تیار ہوا، تو پولیس والوں نے کہا، 'ہم نے جتنا گناہ کیا ہے، اب ہم ہی اس کا جنازہ اٹھائیں گے، شاید اس طرح ہمارے گناہوں کی کچھ معافی مل جائے۔'
اللہ ہمں بھی اپنے حبیب ﷺ سے ایسی محبت عطا فرمائے جیسی اس البانوی نوجوان کو نصیب ہوئی تھی۔ آمین۔"
No comments:
Post a Comment