انتہائی شاندار اور فخر پاکستان پی آئی اے

 

انتہائی شاندار اور فخر پاکستان پی آئی اے

مالٹا، جو کہ 315 مربع کلومیٹر رقبے اور چار لاکھ 29 ہزار کی آبادی والا چھوٹا مگر خوبصورت ملک ہے، یورپ میں ایک منفرد حیثیت رکھتا ہے۔ یہ ملک پاکستان کے ساتھ ایک دلچسپ اور حیرت انگیز رشتے میں جڑا ہوا ہے جو شاید آپ کو حیران کر دے۔

1971 میں مالٹا نے اپنی ایئرلائن بنانے کا فیصلہ کیا اور البرٹ میزی کو اس منصوبے کی سربراہی دی گئی۔ پی آئی اے اُس وقت ایشیا کی سب سے کامیاب ایئرلائن تھی اور اس نے انٹرنیشنل ٹینڈر میں حصہ لیا۔ حیرت انگیز طور پر، یورپ، امریکا اور مشرق بعید کی بڑی بڑی کمپنیوں کو رد کر دیا گیا، اور پی آئی اے کو مالٹا کی ایئرلائن کے قیام کا کام سونپ دیا گیا۔

پی آئی اے نے صرف ایک سال میں ایئر مالٹا کو کامیابی کے ساتھ لانچ کیا۔ 31 مارچ 1973 کو ایئر مالٹا کا قیام عمل میں آیا اور یکم اپریل 1974 کو پی آئی اے کے ذریعے اس کا پہلا طیارہ اڑا دیا گیا۔ پاکستانی ماہرین نے مالٹا کی سول ایوی ایشن کو بھی تشکیل دیا اور ائیرپورٹس کو جدید شکل دی۔

آج ایئر مالٹا یورپ کی کامیاب ترین ایئرلائنز میں شامل ہے جو یورپ، افریقہ، امریکا اور مشرق بعید تک پروازیں کرتی ہے۔ 49 سال گزرنے کے بعد بھی مالٹا کے لوگ پی آئی اے کے احسان کو یاد رکھتے ہیں۔ مالٹا دنیا کا واحد ملک ہے جس نے پی آئی اے کو اپنے تعلیمی نصاب میں شامل کیا ہے، اور وہاں کے بچے آج بھی پی آئی اے پر مضمون لکھتے ہیں۔

یہ وہ زمانہ تھا جب پی آئی اے نے پوری دنیا کو حیرت میں ڈال دیا تھا۔ اس سنہری دور میں پی آئی اے نے سنگاپور ایئرلائن، کورین ایئرلائن، اور ملائشین ایئرلائن بنانے میں مدد دی، جبکہ ایمریٹس کی بنیاد رکھی۔ یہ بات شاید آج ناقابل یقین لگے، لیکن پی آئی اے نے ایمریٹس کو جہاز، پائلٹس، اور ایئر ہوسٹس بھی فراہم کی تھیں۔

کراچی کبھی ایشیا کا دروازہ ہوا کرتا تھا، جہاں سے 80 فیصد مسافر یورپ، افریقہ اور امریکا کے لیے روانہ ہوتے تھے۔ لیکن آج پی آئی اے کہاں کھڑی ہے؟ بدقسمتی سے سیاست، خودغرضی اور ذاتی مفادات کی وجہ سے ہماری قومی ایئرلائن اپنے عظیم ماضی سے دور ہو چکی ہے۔